Skrivað hevur: Sveinur Tróndarson
Fríggjadagur 5. mars 2010, kl. 12.55, 45/133 - Innanlands 

- Skuldu nótaskipini landa til Havsbrún ella eitt nú til virkir í Íslandi og annars fingið tað sama burtur úr, sum tey fingu í fjør, so skuldu skipini havt fiskað millum 40 og 50.000 tons av makreli.
Tað sigur felagið Nótaskip í sambandi við íkomnu støðuna í samband við ósemjuna um makrelin sum hevur við sær, at eingin makrelkvota enn er fingin upp á pláss. Í blaðnum í gjár heldur Jacob Vestergaard, landsstýrismaður við fiskivinnumálum dyrnar opnar fyri, at føroyingar áseta sína egnu kvotu, tí semja ikki fæst um, at føroyingar fáa størri part av makrelkvotuni, men tað er ikki tað, sum felagið Nótaskip vil hoyra.

Verður tað endin, skulu føroyingar ikki rokna við at kunna veiða makrelin, tá hann er best egnaður til matna, og tað kann gerast dýrt fyri nótaskipini, vísir Jógvan Jespersen, stjóri í felagnum Nótaskip á.
- Í fjør fiskaðu okkara skip makrelin, tá hann kundi landast til matna, og tá fingu skipini millum átta og níggju krónur fyri kilo. Verður hann ikki brúktur til matna er prísurin nógv lægri, og tað hevur við sær, at antin koma skipini at missa nógvar pengar, ella mugu skipini fáa eina nógv størri kvotu so tey fáa tað mista innaftur, sigur hann.

Hava rætt til størri part
Hetta seinna hongur bara als ikki saman við, at felagið í løtuni arbeiðir við at fáa fiskiskapin eftir makreli MSC-góðkendan, tí har er ein treyt nevniliga, at tað verður lurtað eftir fiskifrøðiligu tilmælunum. Og ger Fiskimálaráðið av at ganga egnar leiðir, kann spurnartekin av røttum setast við júst hetta.

Jógvan Jespersen dylir ikki fyri, at felagið Nótaskip er samt við fiskimálaráðharranum um, at føroyingar eiga størri part av samlaðu makrelkvotuni.

Tí eru limir í felagnum sannførdir um, at Fiskimálaráðið av øllum alvi skal stríðast fyri at røkka hesum máli, men tað má gerast við at leggja prógv fyri hinar avtalupartarnar um, hví føroyski parturin av kvotuni skal vera størri.

Og eftir øllum at døma er tað er ein partur av trupulleikanum er. Okkara próvtilfar hevur eftir øllum at døma ikki verið nóg gott til at fáa okkara sjónarmið ígjøgnum.

- Felagið er samt við Fiskimálaráðnum um, at vit eiga størri part, men okkara áskoðan er, at vit mugu gera tað við samráðingum, sigur Jógvan Jespersen.

Hava mist nógv
Fyri nøkrum árum síðan hevði pelagiski flotin meira ella minni frítt at fara. Flotin kundi so at siga fiska so nógvan svartkjaft sum honum lysti, men fiskiskapurin eftir svartkjafti er nógv minkaður seinnu árini.
Orsøkin til tað er, at stovnurin er nógv minkaður, og tí mæla fiskifrøðingarnir nú til eina nógv lægri veiðu.

Sambært stjóranum í felagnum Nótaskip hevur henda minking havt við sær, at føroysku nótaskipini hava mist einar 200 milliónir krónur upp á svartkjaftin, og júst tí hevur makrelurin nógv størri týdning í dag.

Tí hevur tað stóran týdning fyri felagið, at skipini sleppa at fiska makrelin, tá mest fæst fyri hann, og tað er, tá hann kann landast til matna.
- Í fjør høvdu vit eina avtalu við ES og Noreg um at vit kundu fiska inni hjá teimum, tá prísurin var hægstur, men ganga vit okkara egnu leiðir í ár, missa vit eisini hetta, og tað kann gerast øgiliga kostnaðarmikið fyri nótaskipini, sigur Jógvan Jespersen.
Tá mugu føroysku skipini fiska makrelin í føroyskum sjógvi, og tá sleppa tey ikki av við makrelin til matna, tí norsku virkini, sum taka móti makreli til matna eru stongd um summarið, tá makrelurin er í føroyskum sjógvi.

Krevja burðardygga veiðu
Felagið Nótaskip hevur í eitt lítið ár arbeitt við at fáa umhvørvisgóðkent fiskiskapin eftir sild og makreli. Sildin er nú MSC-góðkend og væntandi verður makrelurin góðkendur um ikki so langa tíð.

Men velur landsstýrið at áseta føroyingum egna kvotu, kann góðkenningin av makrelveiðuni vera í vanda, og sambært Jógvan Jespersen er tað eitt stig skeiva vegin.
- Hesa stuttu tíð vit hava arbeitt við umhvørvisgóðkenningini eru viðurskiftini broytt nógv. Nú er tað veruliga so, at keypararnir krevja, at fiskurin verður burðardygt veiddur, og tí kann ein manglandi góðkenning koma at kosta okkara fiskiskipum dýrt, sigur hann.
Tí vónar hann, at partarnir klára at fáa eina avtalu upp á pláss fyri í ár, men hann vónar eisini, at Fiskimálaráðið framhaldandi arbeiðir víðari vi málinum um at økja føroyska partin av kvotuni.
- Støðan er trupul, men hon má loysast soleiðis, at vit fáa eina skilagóða loysn fyri allar partar, sigur Jógvan Jespersen.

Dimmalætting ©