Nógvi kuldin í Danmark hevur seinkað arbeiðinum við nýggja Trónda í Gøtu. Tað ber ikki til at mála, tá tað er so kalt í veðrinum, men nú tað er heitari í luftini verður alt sett inn fyri at fáa skipið liðugt
Um ein slakan mánað fær pf. Varðin í Gøtu, sum móðurfelagið nú eitur, sítt nýggja skip.
Í løtuni liggur Tróndur í Gøtu í dokkini hjá Karstensens Skibsværft, har seinasta hond verður løgd á verkið, og eftir ætlan skal skipið vera í Føroyum vikuskiftið 20.-21. februar.
Dávið Jacobsen, tekniskur leiðari hjá pf. Varðanum, sigur í stuttum práti við Dimmalætting, at hann hevur eina grundaða vón um, at tað fer at bera til at halda ta tíðarætlanina.
Veðrið spælt eitt puss
Tað hevur av sonnum verið vetur í Danmark hesa seinastu tíðina. Fyri fyrstu ferð í mong Harrans ár, hava danir havt liggjandi kava við nógvum kulda, og tað hevur givið teimum, sum skulu mála Trónda í Gøtu rættiliga stórar trupulleikar.
- Tað ber ikki til at mála skipið, tá tað er so kalt í veðrinum, sum tað hevur verið her í seinastuni, og tí hava teir bíðað í tolni eftir at tað er blivið líggjari í veðrinum, greiðir Dávið Jacobsen frá.
Nú boða donsku veðurtænasturnar frá eitt sindur heitari veðri, og so setur skipasmiðjan alt inn upp á at fáa skipið málað liðugt.
- Skrokkurin vaskast niður, tað sum er sveisað skal sandblásast og so skal málast. Til tað skulu umstøðurnar vera í lagi og tað sær út til at forsagnirnar í løtuni ganga okkara veg. Annars hava teir her gjørt av at skipa seg øðrvísi fyri at sleppa í gongd, tí tað ber ikki til at bíða longur. Tí hava tey her gjørt av at spenna presendingar út yvir økið teir arbeiða í, so teir kunnu byrja at mála. Men nú boða veðurmenninir frá líggjari veðri, so tað er vón fyri at tað fer at ganga sum tað skal og at vit fara at halda tíðina, greiðir Dávið Jacobsen frá.
Royndartúrurin bíðar
Ætlanin at fara tekniskan royndartúr áðrenn skipið skal doypast tann 6. februar, men hetta er nú broytt soleiðis, at tekniski royndartúrurin verður aftan á at skipið er doypt.
- Tað ber ikki til at flyta runt við dópinum, tí vit skulu hava gestir úr Føroyum í sambandi við dópin, og har er alt viðvíkjandi ferðaseðlum teirra lagt í fasta legu.
Tí hava vit valt at halda fast við, at skipið verður doypt tann 6. februar, sigur Dávið Jacobsen.
Tað hevur so við sær, at royndartúrurin verður útsettur, men sambært Dávið Jacobsen skuldi verið góð tíð at fingið avgreitt tekniska royndartúrin áðrenn skipið fer at sigla heim, antin hósdagin 18. februar ella leygardagin 20.
- Sum tað sær út í løtuni, verður tað annan av hesum báðum døgunum, sigur Dávið Jacobsen.
