Vit løgdu leiðina framvið róðrarneystinum á Argjum í vikuni. Har vóru kvinnurnar á Teistanum í ferð við at gera klárt at fara í bátin at venja. Vit fingu eitt prát við Erlu Olsen, róðurskvinnu á Teistanum.

Hon greiðir frá at tær byrjaðu at venja til kappingarári 2008, longu í november mánaða í fjør, og hava tær mest vant á rógvimaskinunum. Eftir eitt heldur miseydnað kappingarár í 2007, sum tó byrjaði væl við einum flottum øðrum plássi á Norðoyastevnu, ætla tær tað øðrvísi í ár. Vit eru fýra eftir av manningini frá í fjør summar, Joan, Anna, Edna og Elsa og so eru Linda og Erla komnar frá Havfrúnni í Vestmanna og Eirin sum, hevur róð nógv við Bliki er eisini nýggj umborð.

   Teistin 2008: Standandi fr.v: Eirin Wiberg Holm, Elsa Magnussen, Linda Johannesen og Edna Magnussen. Húkandi fr.v: Anna Andresen, Erla Olsen og Joan R. Mikkelsen. (mynd JUS)
 

Máið hjá flestu manningum er sum oftast at verða við har tað er stuttligt at verða, nemliga í oddastríðnum og tað er einki undantak hjá okkum, har vit í ár vilja verða við heilt har frammi, og hava vit eisini vant hart og miðvíst fyri at røkka hesum máli.

Líkindini fyri at hetta skal fara at eydnast hjá teimum í ár, skuldu eisini verið góð, tí hetta eru alt royndar kvinnur sum hava róð kapp í fleiri ár tilsamans.

   Erla Olsen er róðurskvinna og bátsforkvinna á Teistanum í 2008. (mynd JUS)

Nú tað verður tosa so nógv um at tað er so trupult at manna 6 mf. við kvinnum spurgdu vit Erlu um tær høvdu hugsa um hetta. Jú, vit hugsaðu í stutta tíð um at manna Lóm, men síðstu árini hevur tað verið støðugt verri at mannað bátarnar, og eftirsum at tað er lættari at manna eitt fimmannafar við kvinnum, valdu vit heldur hetta. Hví tað er so veit eg ikki. Kanska, um manningar vóru tvingaðar at flyta upp við aldursmarki, var støðan annarleiðis. Eg haldi tó ikki, at aldursmarkið skuldi verið 18 ár sum hjá dreingjum, men heldur 20 ár. Hetta hevði eisini tikið trýstið av nógvu manningunum á fimmannaførunum.

 
   Hesar ætla at verða við í oddastríðnum í summar. (mynd JUS) 

Uppá fyrispurning hvørjir bátar, kunnu fara at gera seg galdandi í summar sigur Erla: Tað sigst at nógvar manningar eru til 5 mf kvinnur í ár. Men ofta eru nógvar gitingar um, hvørjir bátar eru mannaðir, so einki er vist fyrr enn á Norðoyarstevnu. Men vit vita við vissu, at vinnandi báturin frá síðsta ár, Sílið úr Havn, luttekur aftur í ár við somu manning, og tær fara nokk at gera seg galdandi í oddinum. Eisini kann væntast at manningin á Katlu úr Árnafirði fer at blanda seg í oddastríðnum, tær endaðu á einum triðja plássi við Fípuni Føgru síðsta kappingarár, og tær luttaka við so at siga somu manning í ár.

   Tær gera klárt at fara í bátin at venja. (mynd JUS)